ELSHOFFEEST 2026

En dan ......

Zit ik an oonze keuk”ntoafel en kiek terugge op een weekend Feest der Feesten.
Vriejdagoamp trapp”n wie of met de onmeunige pubquiz, tente vol volk en iederene gung dur veur !!
Onmeunig vulle vroag”n mar weinig oaver de Diamant van Salland, vulle algemene vroag”n en veural leerzame vroag”n, wie heb e leert de”j vlotter een dame van 1986 an ut gill”n hebt dan ene van ene van 2006, en det hef niet te maak”n met ut feit oj um an de gedien”n of veagt of niet. 😊 😊
Noadien gung de DJ van dienst onmeunig uut zien dak mar hij had een bettie vergett”n zien muziek keus an te pass”n an de oamp, dus wie stunn”n vriejdagoamp a in zo”n stuk kabaal det wie op tied noar ons mandtie gung”n.
Zoaterdag was de opening veur ut holtdorp, veur de kids, en de volksspelen, poalloop”n, volleyball”n en natuurluk bie Hans op de schotels schiet”n..niks mis met !!
Wie waar’n um 16 uur present veur de muziekbingo, een nieje activiteit die een bult volk in de tente brach, onmeunig mooi bedach en met de goeie app”s, in de buurte, was ut goed te doene...
As dur ene noar ut huussie mos heult de rest de kaarte bie, det is ok de Diamant !!!
De verlotting begun onmeunig vuls te laate, doar waar”n wat zenuwen oaver, gien paniek, alles kump goed en ie weet allemoale de”j gien andere activiteit”n boekt in ut weekend van ut Feest der Feesten.
De verlotting verleup in goede orde, ik kreeg een charmante assistente toebedeelt en ut gung in vlot tempo, iedereene blie.
Wie haal”n doarnoa een heerlijk stukkie vlees vd BBQ en nuttigen nog wat sappies, toen het andeel blote lichaamsdeel”n, ut andeel bedekt begun te oaverstijgen gung”n wie op huus an.
Bie de in- cq uutgang dach”n wie nog eam”n det dur een basisschoole op kamp kwam, mar det lag an oons, wie heb gien wichter dan zie”j det nie goed. 😊 😊
De zundag begun weer nat, het motorische geweld had weer water- en luchtkoeling, onmeunig jammer weer....
De gemeente kwam ok eam”n inspectie hoald”n, det heurt dur ok zo bie, mar met een kundig bestuur is dur niks loos !!
Teag”n 15 uur kwam de brommerploeg weer binn”n roll”n en word”n de gezelligheid voort e zet op ut terras, de complete Elshofse reünie kwam weer op gang en iederene preut weer, veur een joar, een bunder bie..
Zo zakk”n wie, met mekaare, weer mooi op ut ende an van een onmeunig mooi stukkie Sallandse traditie !!!
Elshoffeest, het Feest der Feesten !!!
Bestuur, vrijwilligers, iedereene veur en achter de schermen, onmeunig bedankt det ulle ons in de gelegenheid e stelt hebt um weer een onmeunig mooi weekend te hebb”n, zonder det ulle oons in de modder leut”n zakk”n 😊 😊 !!!!

Jan Dijkslag